Num 4 | NdeIBE | STEP | UJehova wathi kuMosi lo-Aroni:

Numbers 4

AmaKhohathi

1 UJehova wathi kuMosi lo-Aroni: 2 “Balani ingxenye yabaLevi abangamaKhohathi libale ngosendo langezindlu zabo. 3 Balani wonke amadoda kusukela kwabaleminyaka engamatshumi amathathu kusiya kwabaleminyaka engamatshumi amahlanu yokuzalwa abeza bezosebenza emsebenzini weThente lokuHlanganela.

4 “Lo yiwo umsebenzi ozakwenziwa ngamaKhohathi eThenteni loku-Hlanganela: ukulondoloza yonke into engcwelengcwele.

5 Nxa kuthuthwa kusukwa ezihonqweni, u-Aroni lamadodana akhe kabangene bayekwethula ikhetheni elisithileyo basibekele ibhokisi lesivumelwano ngalo. 6 Lokhu bazakugubuzela ngezikhumba zezinyamazana, bendlale ilembu eliluhlaza okwesibhakabhaka phezu kwalokho babe sebefaka izibambo endaweni yazo.

7 “Phezu kwetafula yoBukhona bukaJehova kumele bendlale ilembu eliluhlaza okwesibhakabhaka bafake phezu kwalo imiganu, izinditshi lezingubhe, lenkezo zeminikelo enathwayo; kuthi lesosinkwa esihlala sikhonapho sisale phezu kwayo.

8 Phezu kwalokhu bazakwendlala ilembu elibomvu, bembese lokho ngezikhumba zezinyamazana babe sebefaka izibambo ezindaweni zazo.

9 “Kumele bathathe ilembu eliluhlaza okwesibhakabhaka bembese ngalo uluthi lwesibane esokukhanyisa, kanye lezibane zalo, izintambo zesibane kanye lezibambiso zakhona, lemiganu, lezitsha zamafutha zokuthelisa kuso. 10 Besebelugoqela kanye lezinto zalo zonke ngezikhumba zezinyamazana balufakele izibambo zokuthwala.

11 “Phezu kwe-alithare legolide kabendlale ilembu eliluhlaza okwesibhakabhaka bagoqele ngezikhumba zezinyamazana babe sebefaka izibambo zokuthwalisa endaweni yazo.

12 “Bazathatha zonke izinto zokusebenzisa endaweni engcwelengcwele, bazigoqele ngelembu eliluhlaza okwesibhakabhaka, bembese ngezikhumba zezinyamazana bafake phezu kwethala lokuthwalisa.

13 “Kumele babuthe umlotha bawususe phezu kwe-alithare elilithusi babe sebesendlala ilembu eliyibubende phezu kwalo. Kube yikhona bezafaka zonke izitsha ezisetshenziswa emsebenzini we-alithare, kuhlanganisa lezindengezi zeziko, izitsha zokosa inyama, amafotsholo lemiganu yokuchelisa. 14 Phezu kwalo kumele bendlale isembeso sezikhumba zezinyamazana babe sebefaka izibambo zokuthwalisa endaweni yazo.

15 “Ngemva kokuba u-Aroni lamadodana akhe sebeqedile ukwembesa izimpahla zonke ezendawo engcwele lazo zonke izinto ezingcwele, kanye lokuthi sebelungele ukusuka, amaKhohathi yiwo okumele eze azothwala. Kodwa akumelanga bathinte izinto ezingcwele ngoba bazakufa. AmaKhohathi azathwala lezozinto eziseThenteni lokuHlanganela.

16 “U-Eliyazari indodana ka-Aroni, umphristi, uzakhangela amafutha esibane, impepha, umnikelo ojayelekileyo wamabele lamafutha okugcoba abakhethiweyo. Uzagcina ithabanikeli ngonanzelelo layo yonke into ephakathi kwalo, kanye lezimpahla ezingcwele lezitsha zalo.”

17 UJehova watshela uMosi lo-Aroni wathi,

18 “Nanzelelani ukuthi izizwe zosendo lwamaKhohathi azehlukaniswa laba-Levi.

19 Lokhu kuyikuthi baphile bengafi nxa bethe basondela phansi kwezinto ezingcwelengcwele, balungiseleni lokhu: U-Aroni lamadodana akhe bazakuya endaweni engcwele bayekwabela indoda yinye ngayinye umsebenzi wayo kanye lalokho okumele bakuthwale. 20 Kodwa amaKhohathi akumelanga angene ukuthi ayebona izinto ezingcwele, loba okomzuzwana nje kuphela, ngoba bazakufa.”

AmaGeshoni

21 UJehova wathi kuMosi, 22 “Bala njalo amaGeshoni ngezindlu langosendo lwawo.

23 Bala wonke amadoda kusukela kwabaleminyaka engamatshumi amathathu kusiya kwabaleminyaka engamatshumi amahlanu yokuzalwa labo abezayo ukuzosebenza eThenteni lokuHlanganela.

24 “Lo ngumsebenzi okumele wenziwe ngabosendo lwamaGeshoni ekusebenzeni kwabo lekuthwaleni kwabo imithwalo:

25 Bazathwala amakhetheni ethabanikeli, iThente lokuHlanganela, isembeso salo kanye lesangaphandle esezikhumba zezinyamazana, amakhetheni entuba yeThente lokuHlanganela,

26 amakhetheni eguma elihonqolozele ithabanikeli le-alithare, ikhetheni lesango, izintambo lakho konke okusetshenziswa kulo umsebenzi. AmaGeshoni azakwenza konke okumele kwenziwe ngalezizinto. 27 Imisebenzi yabo yonke abayenzayo, kumbe yikuthwala kumbe ngumsebenzi othile, bazayenza ngokuqondisa kuka-Aroni lamadodana akhe. Uzabapha kube ngumlandu wabo ukuthwala lokho ozabe uthe bakuthwale. 28 Lokhu kuzakuba ngumsebenzi wabosendo lwamaGeshoni eThenteni lokuHlanganela. Umsebenzi wabo bazawenza ngokuqondisa kuka-Ithamari indodana ka-Aroni, umphristi.

AmaMerari

29 “Bala amaMerari ngosendo langezindlu zawo. 30 Bala wonke amadoda kusukela kwabaleminyaka engamatshumi amathathu kusiya kwabaleminyaka engamatshumi amahlanu yokuzalwa abezayo ukusebenza eThenteni lokuHlanganela. 31 Lo yiwo ozakuba ngumsebenzi wabo eThenteni lokuHlanganela: ukuthwala amathala ethabanikeli, imithando yalo, izinsika lezisekelo, 32 kanye lezinsika ezihonqolozele iguma kanye lezisekelo zazo, izikhonkwane zethente, amagoda, izitsha zakhona lakho konke okuhambelana lokusetshenziswa kwazo. Batshengise bonke munye ngamunye lezozinto abafanele bazithwale. 33 Lo yiwo umsebenzi ozakwenziwa ngabosendo lwamaMerari ekusebenzeni kwabo eThenteni lokuHlanganela beqondiswa nguIthamari indodana ka-Aroni, umphristi.

Ukubalwa kwabosendo lwamaLevi

34 UMosi, u-Aroni labakhokheli babantu babala amaKhohathi ngosendo langezindlu zawo. 35 Wonke amadoda aleminyaka esukela kwaba leminyaka engamatshumi amathathu kusiya kwabaleminyaka engamatshumi amahlanu abezayo ukusebenza eThenteni lokuHlanganela, 36 bebalwa ngosendo, baba zi 2,750.

37 Leli linani eligcweleyo lalabo abosendo lwamaKhohathi abasebenza eThenteni lokuHlanganela. UMosi lo-Aroni babala njengokulaywa kwabo nguJehova etshela uMosi.

38 AmaGeshoni abalwa ngosendo langezindlu zawo. 39 Wonke amadoda asukela kwabaleminyaka yokuzalwa engamatshumi amathathu kusiya kwabaleminyaka engamatshumi amahlanu ababesebenza eThenteni lokuHlanganela, 40 bebalwa ngosendo langezindlu zabo, baba zi 2,630. 41 Leli linani eligcweleyo labosendo lwamaGeshoni abasebenza eThenteni lokuHlanganela. UMosi lo-Aroni babala njengokulaywa kwabo nguJehova.

42 AmaMerari abalwa ngosendo langezindlu zawo. 43 Wonke amadoda ayeleminyaka yokuzalwa esukela kwabalamatshumi amathathu kusiya kwabaleminyaka engamatshumi amahlanu ababezosebenza eThenteni lokuHlanganela, 44 sebebaliwe ngosendo lwabo, babazi 3,200. 45 Leli kwaba linani eligcweleyo kwabosendo lwamaMerari. UMosi lo-Aroni babala njengokulaya kukaJehova elaya uMosi.

46 Ngalokho uMosi, u-Aroni labakhokheli bako-Israyeli babala bonke abaLevi ngosendo langezindlu zabo. 47 Wonke amadoda asukela kwabaleminyaka engamatshumi amathathu kusiya kwabaleminyaka engamatshumi amahlanu yokuzalwa abeza ukulungisa kanye lokuthwala iThente lokuHlanganela 48 babezi 8,580.

49 Ngokulaya kukaJehova elaya uMosi, ngulowo lalowo wabelwa umsebenzi wakhe ayezawenza lokwakumele akuthwale. Yiyole indlela ababalwa ngayo, njengokulaywa kukaMosi nguJehova.